Qershor 22, 2018

reklama kryesore bar
reklama kryesore bar

Cili ishte skenari i PD-së që u shkri si “shurra e pulës”?

Cili ishte skenari i PD-së që u shkri si “shurra e pulës”?

KMA NEWS / Protestuesit ishin përgatitur për të qëndruar ditë-natë duke e rrethuar krejt kryeministrinë, por selia blu i drejtoi kah sheshi “Skenderbej” për të parë podiumin e skenës ku do të këndojë Rita Ora.

-U fol dje para dite për një skenar të cilin e dinte vetëm Lulzim Basha, ku do të paralizohej kryeministria dhe krejt qeverisja e vendit. Por asgjë nuk ndodhi.

Populli opozitar priste dje përballje direkte me kryeministrin Edi Rama dhe ministrat e tij. U mbars krejt opozita e publiku se dje populli i revoltuar do të mbaronte punë me këtë klikë kriminale dhe të drogës, siç akuzon përditë PD. U fol se opozita nuk do të lejonte më të qeveriste Edi Rama. U fol se kishte një plan të detajuar që dita e hënë do të sillte një krizë politike dhe kryeministri bashkë me ministrat do të jepnin dorëheqjen për të shkuar në një qeveri tjetër integruese. U fol se Lulzim Basha dhe partitë e tjera do të sillnin mbi 200 mijë veta përballë Kryeministrisë, aqsa bëri që kryeministri me gjithë disa ministra të besuar të nxitonin për të marrë udhën për në Skrapar. Bile u hapën fjalë se po pastronin bunkerët e kohës së Enver Hoxhës në Çorovodë për t’u futur brenda në rast se Tirana ishte në pushtetin e popullit të revoltuar nga Edi Rama. U fol se garda dhe helikopterë ishin në Skrapar, pasi Tirana do merrej nga pasioni, revolta dhe populli integrues i opozitës. Jo pushteti, pasi merret me votë, porse mbrëmë në darkë qeveria e PS-së do të mund të jepte dorëheqjen nga revolta e cila do bllokonte kryeministrinë nga të katër anët.

U fol për një skenar të cilin e dinte vetëm Lulzim Basha. Natyrisht pa gjakderdhje, pa djegie, por me një plan sipas PD-së, ku do të paralizohej kryeministria dhe krejt qeverisja e vendit.

Por ç’ndodhi? Protestuesit u mblodhën në Bulevardin “Dëshmorët e Kombit”, në orën 11:00, me thirrjet: “E duam Shqipërinë si gjithë Europa”. Natyrisht ishte një numër protestuesish me i paktë se 21 janari 2018. Populli priste të flisnin njeri pas tjetrit liderët kryesorë të opozitës, të fliste edhe populli dhe natyrisht në fund, siç i takon, do ishte Lulzim Basha ai që do ngrinte zjarrin e zemrave opozitare e ku më pas populli ishte zot i fateve të tij. Siç pati thënë analisti i njohur Andi Bushati se edhe ndonjë djegie mund të kishte, por mesazhi i protestës do të ishte t’i tregohej vendi përfundimisht Edi Ramës. Kemi parë protesta në Greqi, Itali, Francë, Angli e kudo dhe përfundimi nuk është kaq i butë sa ç’ndodhi dje në Tiranë. Njerëzit donin më tepër liri, më shumë forcë e vendosmëri opozitare. Ishin gati për heroizma kundër mafies, krimit dhe keqqeverisjes.

Në këtë protestë pati vetëm një fjalim nga ana e Lulzim Bashës. Ai foli kundër Ramës dhe Xhafajt, por popullin për përplasje e drejtoi te zyra e ministrit të Brendshëm. Në fund të fjalës së tij, kreu i PD-së u bëri thirrje qytetarëve që të shkojnë drejt sheshit “Skënderbej” dhe konkretisht te ministria e Brendshme, ku ishte ministri Xhafaj në zyrë me disa të huaj. Dhe ishin të huaj që po hetojnë korrupsionin e disa zyrtarëve shumë të lartë, majtas e djathtas. Në këtë moment, mes protestuesve dhe forcave të rendit nisën incidentet dhe përplasjet, të cilat vazhduan për më shumë se 30 minuta. Gjatë tensioneve me policinë u plagos edhe kryeredaktori i gazetës “RD” Bledi Kasmi.

Përveç gazetarit drejtues të “RD” janë plagosur edhe 11 policë nga përplasja me turmën. Disa protestues qëlluan policët duke hedhur sende të forta dhe lëndë tymuese. Natyrisht në një protestë të tillë gjithçka mund të ndodhte. A jemi në demokraci, kur populli mendon se i ka ardhur shpirt ndër dhëmbë ngrihet dhe nuk pyet se cilin rrëzon apo djegë.

Kur dukej se situata do të përshkallëzohej edhe më shumë, kreu i PD-së, Lulzim Basha bëri thirrje për tërheqje të protestuesve nga Ministria e Brendshme. Në fakt, kur turma e protestuesve po përplasej para ministrisë Basha nuk ishte aty. Ai erdhi kur dikush e ka telefonuar nga jashtë. Erdhi dhe tërhoqi popullin e revoltuar. Dikush mund të thotë se veproi mirë, të tjerë flasin me inat se u tregua frikacak. Por fakti është se erdhi me vrap, natyrisht me mënyrë ekselente sikur po përshëndeste me dy gishtat lart, ndonëse dikush e dërgoi urgjent para ministrisë.

Të huajt e telefonuan apo ndonjë frikë? Nëse do të ishte populli para kryeministrisë kaq i vendosur, sa para ministrisë, nuk dihej përfundimi. Megjithatë një gjë dihej; dje kishte rënie të qeverisë sipas skenarit të Lul Bashës. Por Lulzim Basha nuk e bëri. Nuk kishte skenar? Pse? Ka nevojë për mbledhje faktesh të tjera se pse nuk e la të lirë popullin të vendoste siç para disa ditëve vetë Basha thoshte se “populli vendos të shtunën”.

Populli opozitar ishte për përballje, lidershipi jo! A do të vijnë më në protestë, populli i revoltuar kundër keqqeverisjes? Nuk besoj! Shansi ishte dje. Ndaj kryeministri Rama tallet kaq keq me PD-në dhe Bashën. E di se nuk kanë forcë e vendosmëri. Po të ishte Sali Berisha në krye të PD dhe të protestës, dje kishte mbaruar qeveria Rama. Edi Rama e di se cilin ka përballë! E ka njohur me 17 maj 2017. Mbrëmë nga Skrapari ku darkonte, kryeministri tallej me aksionin e radhës së. Dhe ia bën mirë kësaj opozite. Po të kishte vendosmëri Lulzim Basha, kur thotë se kemi qeveri droge, krimi e korrupsioni, atëherë populli merr vetë në dorë fatet e tij. Populli iku në shtëpi i zhgënjyer duke ia lënë përgjegjësinë kreut të PD.

Sigurisht protestë ideale nuk ka. Mes shumë humbjeve, kritikave dhe talljeve që ka marrë dje kreu i PD-së, ka dhe një anë tjetër të medaljes. Protesta sado e tallur dhe e përbuzur nga qeveria dhe një pjesë e anti-opozitarëve ka një bilanc minimal pozitiv. Në protestë pati dhunë nga protestuesit, por interesant është fakti se SHBA dhe BE nuk shpejtuan të dënojnë aktet e opozitës, siç ka ndodhur më parë. Është një heshtje me shumë kuptime, por fakti që s’ka reagim si “fletërrufe” ndaj opozitës është një zhvillim që në PD cilësohet edhe si mbështetje.  Nga zhvillimi i djeshëm ndërkombëtarët morën sinjalin se punët nuk janë në rregull dhe gjërat nuk mund të vazhdojnë shumë gjatë kështu.

Megjithatë “skenarin Basha” që do të rrëzonte qeverinë nuk e pamë gjëkundi. Protestuesit ishin përgatitur për të qëndruar ditë-natë duke e rrethuar krejt kryeministrinë, por i drejtuan kah sheshi “Skenderbej” për të parë sheshin ku do të vijë Rita Ora.

Dje ishte zjarri i shpirtit opozitar që mezi priste… E devijuan mjeshtërisht drejtuesit e PD-së.

A.Marku

About The Author

Related posts